Pas 18 vjetësh veprimtarie, në Institutin “ISSAT” – Instituti i Studimeve Strategjike dhe Trajnimeve, u themelua ART ROOF, hapësira kulturore-artistike, e cila do t’i përgjigjet nevojës së shoqërisë sonë për Art dhe Kulturë të përtërirë, vitale, autentike, të trashëgueshme.
Ngritja e ART ROOF, u frymëzua në emër të thirrjes, kumtit tonë të brendshëm e të shumë shqiptarëve, për të rikthyer me durim e besim, fuqinë, efektin magnetik të Kulturës dhe Artit ndaj një Kombi dhe Shoqërie.
ART ROOF është reflektim, vetëdije, mision, sfidë pēr të orientuar, ndihur, mbështetur Kulturën dhe Artin shqiptar në këtë epokë, ku gjindja nxiton, rend, gulçon pas një jete të përcaktuar nga galopi i teknologjisë, materializmi dhe konsumizmi i pafre.
ART ROOF është takim me shpirtëroren, të bukurën, të vërtetën, vlerat e mirëfillta, ato që janë braktisur masivisht dhe ato që shtresëzohen e shumohen ditë pas dite si antivlera.
ART ROOF do të ftojë dhe bashkëudhëtojë me të gjithë artdashësit, krijuesit, autorët me përvojë dhe rishtarë të të gjitha zhanreve artistike, sipërmarrjet, komunitetet kulturore, intelektualët, që besojnë se të duash, ndjesh vendin tënd si “terram patriam”, do të thotë të punosh, veprosh e të mos epesh.
